President Otto Kjetil Nytun takker Jarle Osnes for flott presentasjon av utstillinga!
Jarle Osnes fyller 90 år i år. I den anledning stiller Ulstein kunstlag ut 50 av bileta til den engasjerte arkitektkunstnaren.
Osnes er utdanna ved Chalmers Tekniska Högskola Gøteborg, der han også budde og dreiv sitt eige arkitektfirma i mange år. Han kom flyttande tilbake til Ulstenvik i 1979, og på midten av 80-talet heldt han si første utstilling i Ulstein kunstlag.
Osnes nyttar både penn, blyant, kolstift og oljemåling i bileta sine. Dei eldste penneteikningane som er med på utstillinga er 25 år gamle. Det er desse teikningane som er kjernen i utstillinga, han omtalar dei som tankestrek. Detaljrikdomen i penneteikningane er overveldande. Ein kan lese i bileta som ein les i ei bok. Det er ikkje noko tilfeldig i framstillingane hans, det ligg alltid noko bak. For Osnes er det viktig med innhald i kunsten, ikkje berre kunst for kunsten si eiga skuld.
Dei 15 kolstiftteikningane som Osnes stiller ut er laga no i haust. Med stø hand skildrar han ulike stemningar ved hjelp av ulike gråtonar, det er nesten som vi kan kjenne vinden som bles inne i bileta.
Osnes hentar inspirasjon frå mellom anna bøker og tv, og hans interesse for middelalderen kjem godt fram i penneteikningane. Vi kan også sjå hans fasinasjon for den spanske kunstnaren og grafikaren Francisco Goya, både når det kjem til teknikk og tema.
Samstundes som Osnes tek opp tunge og noko dystre tema, så er bileta hans også i stor grad prega av humor. Vi finn både Snåsamannen, Prinsesse Märtha Louise, troll og alvar i bileta hans, og han har også bilete som viser ulike karakterar frå heimbygda.
